Haier вазни 2 кг дан кам бўлган титан ва суюқ материалли экзооскелетни тақдим этди
Haier компанияси сунъий интеллект билан жиҳозланган янги роботлаштирилган экзооскелетни намойиш этди. Haier В3 модели тўлиқ углерод толаси ва титан қотишмасидан ишланган бўлиб, унинг вазни бор-йўғи 1,75 кг ни ташкил этади. Бу кўрсаткич соҳада янги рекорд сифатида қайд этилди. Бу ҳақда Ixbt.com хабар беради.
Haier В3 қурилмасида зарба юкламаларини самарали юmsҳатиш ва бўғимларни ҳимоя қилиш учун неньютон суюқ материалларидан фойдаланилган. Неньютон суюқлиги ўзига хос хусусиятга эга бўлиб, унинг қовушқоқлиги таъсир кучи ёки тезлигига қараб ўзгаради. Кескин зарба пайтида у қаттиқ ҳолатга ўтади, секин таъсир кўрсатилганда эса одатий суюқлик каби ҳаракатланади.
Мазкур қурилма 3.0 версиясидаги сунъий интеллектга асосланган юришни таҳлил қилиш алгоритми ва кўп ўлчовли датчиклар билан жиҳозланган. Бу тизим фойдаланувчининг ҳаракатланиш ниятини миллисекундлар ичида аниқлаш имконини беради. Шунингдек, Haier В3 кундалик спортнинг 12 турига интеллектуал мослаша олади ва автоматик равишда оптимал ёрдам режимини танлайди.
Техник имкониятларига кўра, экзооскелет иккита юқори моментли двигател ва аккумулятор билан таъминланган. У ҳар бир оёққа 16 Н·м гача ёрдамчи куч беради, натижада юкламани 5 кг га камайтиради ва тананинг энергия сарфини 37 фоизгача тежашга ёрдам беради.
