Snowflake ва AWS ўртасида 6 миллиард долларлик йирик келишув имзоланди
Булутли маълумотларни сақлаш гиганти Snowflake компанияси Amazon Веб Сервисес (AWS) билан янги беш йиллик ҳамкорлик шартномасини имзолади. 6 миллиард долларлик ушбу келишув сунъий интеллект (AI) инфратузилмасини ривожлантиришга қаратилган. Маълумот учун, Snowflake 2012-йилда ташкил этилганидан бери AWS Маркетпласе орқали жами 7 миллиард долларлик хизмат кўрсатган бўлса, янги шартноманинг ўзи деярли шу миқдорга тенгдир. Бу ҳақда Techcrunch.com хабар беради.
Компания вакилларининг таъкидлашича, мижозларнинг AWS платформасидаги харажатлари кескин ўсиб бормоқда ва 2025-йилнинг ўзида бу кўрсаткич 2 миллиард долларга етиши кутилмоқда. Бу ўсишнинг асосий драйвери — сунъий интеллект технологияларидир. Snowflake ўзининг Кортех AI воситаси орқали корхоналарга маълумотлар базаси билан оддий тилда мулоқот қилиш, ҳисоботларни умумлаштириш ва бошқа ақлли функцияларни таклиф этмоқда.
Ушбу келишувнинг муҳим жиҳати шундаки, Snowflake Amazon томонидан ишлаб чиқилган АРМ архитектурасига асосланган Гравитон процессорларидан фойдаланишни кенгайтиради. Сунъий интеллект моделлари ўқитиш босқичидан кундалик фойдаланиш ва автоном агентлар босқичига ўтар экан, CPU (марказий процессор) қувватига бўлган талаб кескин ошади. NVIDIA чиплари асосий ҳисоблашларни бажарса-да, Гравитон каби процессорлар AI агентларининг ишлаши учун тежамкор ва самарали ечим ҳисобланади.
Amazon раҳбари Энди Жассй ўтган ойда компаниянинг ўз чиплари NVIDIA маҳсулотларига қараганда яхшироқ нарх-самарадорлик нисбатини тақдим этишини айтиб ўтган эди. Арзонроқ ва самарали чиплар йирик мижозларни жалб қилмоқда. Масалан, яқинда Meta компанияси ҳам ўзининг AI эҳтиёжлари учун миллионлаб Гравитон чипларини сотиб олиш бўйича AWS билан шартнома имзолади.
Ҳозирда барча йирик булутли хизмат кўрсатувчилар, жумладан Google ва Microsoft ҳам ўзларининг шахсий AI чипларини ишлаб чиқишмоқда. Microsoft январ ойида Маиа AI чипини тақдим этган бўлса, Google йиллардан бери ўз чипларидан фойдаланиб келмоқда. Бу тенденция NVIDIA'нинг бозордаги мутлоқ ҳукмронлигига қарши булутли гигантларнинг жиддий рақобат бошлаганидан далолат беради.
