Янги Boeing 737 самолётларини сертификатлаш 80 фоиздан ортиқ якунланди
Boeing компанияси яқин ойлар ичида 737 оиласига мансуб самолётларни ишлаб чиқариш ҳажмини ойига 42 тадан 47 тагача оширишни режалаштирмоқда. Бу ҳақда компания бош директори Келли Ортберг АҚШ Федерал авиация бошқармаси (ФАА) билан ўтказилган музокаралардан сўнг маълум қилди. Бу ҳақда Ixbt.com хабар беради.
Ортбергнинг сўзларига кўра, авиагигант аллақачон ишлаб чиқаришнинг янги даражасига ўтиш ҳаракатларини бошлаб юборган. Шу билан бирга, Boeing 737-10 ва 737-7 моделлари сертификатлашнинг якуний босқичида экани хабар қилинди.
Компания аниқлик киритишича, ушбу самолётлар бўйича синов дастури ҳозирда 80 фоиздан ортиқ даражада бажарилган. Бу эса янги лайнерларнинг тез орада фойдаланишга топширилишидан далолат беради.
Эслатиб ўтамиз, жорий йилнинг март ойида Boeing ишлаб чиқаришдаги нуқсонлар туфайли 737 МАХ лайнерларининг бир қисмини етказиб бериш кечикиши ҳақида огоҳлантирган эди. Эндиликда компания ушбу муаммоларни бартараф этиб, суръатни оширишга эътибор қаратмоқда.
