Changan yangi Deepal S05 krossoverini taqdim etadi: 381 ot kuchi va toʻliq uzatma
Changan kompaniyasi Rossiya bozori uchun Deepal S05 elektr krossoverini sertifikatlashtirish jarayonini yakunladi. Model rasmiy OTTS hujjatini qoʻlga kiritdi va uning sotuvlari 2026-yilning uchinchi choragida boshlanishi kutilmoqda. Yangi model oʻzining texnik koʻrsatkichlari va keng saloni bilan ajralib turadi. Bu haqda Ixbt.com xabar beradi.
Deepal S05 ikki motorli kuch qurilmasi bilan jihozlangan boʻlib, bu uning toʻliq uzatmali (AWD) tizimda ishlashini taʼminlaydi. Avtomobilning umumiy quvvati 381 ot kuchiga teng, nominal quvvati esa 146 ot kuchini tashkil etadi. Litiy-temir-fosfatli akkumulyator bilan jihozlangan krossover bir quvvatlanishda 500 kilometrgacha masofa bosib oʻta oladi.
Avtomobilning gabarit oʻlchamlari 4620 x 1900 x 1600 mm ni tashkil etadi. Eng eʼtiborli jihati shundaki, uning gʻildirak bazasi 2880 mm ga teng — bu koʻrsatkich hatto Toyota Land Cruiser 300 yoki Geely Monjaro kabi yirik yoʻltanlamaslarnikidan ham kattaroqdir. Bunday uzun baza oʻz klassida eng keng salonlardan birini kafolatlaydi.
Xavfsizlik va texnik jihozlanish nuqtayi nazaridan Deepal S05 diskli tormoz tizimi hamda energiyani rekuperatsiya qilish funksiyasi bilan taʼminlangan. Shuningdek, model ABS, BAS, ESC barqarorlik tizimlari, frontal va yon xavfsizlik yostiqchalari hamda favqulodda chaqiruv tizimi bilan boyitilgan.
