Valijon Shamshiyev Yashnoboddagi «Barkamol avlod» bolalar maktabiga direktor etib tayinlandi

^{Foto: Respublika «Barkamol avlod» bolalar maktabi}
Qiziqchi va so‘z ustasi Valijon Shamshiyev Toshkent shahri Yashnobod tumani «Barkamol avlod» bolalar maktabi direktori lavozimiga tayinlandi. Bu haqda Respublika «Barkamol avlod» bolalar maktabi matbuot xizmati xabar berdi.

«Hammamizning maqsadimiz bitta — O‘zbekiston kelajagini yanada gullatib yashnatish va uning uchun farzandlarimizni tarbiyalash. Farzandlar tarbiyasida qo‘limdan kelgancha sizlar bilan birgalikda xizmat qilaman», — deya o‘z xizmat vazifasiga kirishdi san’atkor.

^{Foto: Respublika «Barkamol avlod» bolalar maktabi}
Ta’kidlanishicha, tayinlov Xalq ta’limi vazirligi xulosasi asosida amalga oshirilgan.

Ma’lumot uchun 2019 yilning oktabrida Prezident qaroriga muvofiq, Xalq ta’limi vazirligi tasarrufidagi «Barkamol avlod» respublika va hududiy bolalar markazlari negizida Respublika va hududiy «Barkamol avlod» bolalar maktablari tashkil etilgan edi. «Barkamol avlod» bolalar maktablarida 2020/2021-o‘quv yilidan boshlab «STEAM — ta’lim» dasturi joriy etilishi belgilangan.