Angliya terma jamoasida “Arsenal” futbolchilari yorqin o‘yin ko‘rsatdi

Bukayo Saka va Eberechi Ezening gollari Angliya terma jamoasiga Serbiyaga qarshi o‘yinda g‘alaba keltirdi (2:0). Ushbu o‘yin JCh–2026 saralash bosqichining so‘nggi oldi turida bo‘lib o‘tdi.

24 yoshli Saka 28-daqiqada hisobni ochgan bo‘lsa, uning 27 yoshli jamoadoshi Eze 90-daqiqada yakuniy hisobni o‘rnatdi. Opta statistikalariga ko‘ra, bu tarixda beshinchi marta “Arsenal” futbolchilari Angliya terma jamoasi safida bitta o‘yinda gol urishga muvaffaq bo‘lishgan.

Oxirgi marta bunday holat 2021-yil noyabrida San-Marino bilan o‘tkazilgan o‘yinda Saka va Emil Smit-Rou tomonidan qayd etilgan edi. Angliya terma jamoasi ushbu g‘alaba bilan AQSh, Meksika va Kanadada bo‘lib o‘tadigan JCh–2026ga yo‘llanmani muddatidan oldin qo‘lga kiritdi.