Al-Nasr Ronaldu bilan 2027 yildan keyin ham qolmoqchi

Hujumchi Krishtianu Ronaldu 2027 yil yozida, «Al-Nasr» bilan amaldagi shartnomasi yakunlangach, jamoani tark etish niyatida. Bu haqda euro-football.ru xabar beradi.

Jurnalist Ben Jeykobs xabariga ko‘ra, Saudiya Arabistoni portugaliyalik futbolchini mamlakatda ushlab qolishning yangi yo‘lini ko‘rib chiqmoqda: Ronaldu klub egasi sifatida «Al-Nasr»dagi ulushini hozirgisidan oshirib, 15 foizgacha yetkazishi mumkin. Liga esa Ronaldu ketgan taqdirda jahon jamoatchiligi qiziqishi keskin pasayib ketmasligi uchun turli rejalarni o‘rganmoqda.

Ronaldu 2023 yilda erkin agent sifatida «Al-Nasr»ga kelib qo‘shilgan. Joriy mavsumda u Saudiya klubi safida 20 o‘yinda maydonga tushib, 17 ta gol urdi va 3 ta golli pas berdi.