Slutskiy jamoasi Osiyo Chempionlar Ligasida yana yutqazdi

Leonid Slutskiy boshqaruvidagi «Shanxay Shenxua» Osiyo Chempionlar Ligasining umumiy bosqichi 6-turida navbatdagi mag‘lubiyatni qabul qilib oldi. Xitoy klubi safarda «Sanfrechche Xirosima»ga 0:1 hisobida imkoniyatni boy berdi. Bu haqda euro-football.ru xabar beradi.

Uchrashuvdagi yagona gol 78-daqiqada kiritildi: mezbonlar himoyachisi Hayato Araki hal qiluvchi zarbani aniq yo‘lladi. Bu natija «Shanxay Shenxua» uchun turnirdagi ketma-ket uchinchi mag‘lubiyat bo‘ldi.

Olti turdan so‘ng 4 ochko to‘plagan Slutskiy jamoasi jadvalda 11-o‘rinda bormoqda. «Xirosima» esa 11 ochko bilan uchinchi pog‘onadan joy olgan.