Slutskiy boshqaruvidagi Shanhay Shenxua Osiyoda yana yutqazdi

Leonid Slutskiy murabbiylik qilayotgan «Shanhay Shenxua» Osiyo Chempionlar ligasida navbatdagi uchrashuvni ham ochkosiz yakunladi. Xitoy klubi umumiy bosqichning 6-turida safarda «Xirosima»ga 0:1 hisobida imkoniyatni boy berdi. Bu haqda euro-football.ru xabar beradi.

Uchrashuv taqdirini 78-daqiqada kiritilgan gol hal qildi: mezbonlar safida himoyachi Hayato Araki aniq zarba bilan farqni yuzaga keltirdi. Bu natija «Shanhay Shenxua» uchun musobaqadagi ketma-ket uchinchi mag‘lubiyat bo‘ldi.

Olti turdan so‘ng Slutskiy jamoasi 4 ochko bilan turnir jadvalida 11-o‘rinda bormoqda. «Xirosima» esa 11 ochko jamg‘argan holda 3-pog‘onani egallab turibdi.