Қозоғистон ва Ўзбекистон ўртасидаги савдо айланмаси йилдан-йилга мустаҳкамланиб бормоқда. 2025 йилнинг январь–сентябрь ойлари якунларига кўра, қўшни давлатнинг Ўзбекистонга йўналтирган экспорт ҳажми 2,5 миллиард долларга етди. Бу ўтган йилнинг шу даврига нисбатан салмоқли — 26 фоизлик ўсиш демакдир. Айниқса, Марказий Осиёда Қозоғистон маҳсулотларининг асосий харидорлари қаторида бизнинг мамлакат етакчи ўринни эгаллаётгани эътиборга лойиқ.
Экспорт таркибига назар ташланса, қишлоқ хўжалиги маҳсулотлари етказиб бериш ҳажми кескин ошгани кўзга ташланади. Масалан, юмшоқ буғдой экспорти бир йил ичида 20,2 фоизга ўсиб, 479,4 миллион долларлик кўрсаткичга етди. Бу рақам икки давлат ўртасидаги озиқ-овқат хавфсизлиги ва хомашё савдосидаги янги тенденцияларни акс эттиради.
Қозоғистондан келтирилаётган кунгабоқар ва сафлор ёғи бўйича ҳам рекорд кўрсаткич қайд этилди — импорт ҳажми бир неча баробарга ўсиб, 170,8 миллион долларга етди. Бу эса 124,2 фоизлик ўсиш даражаси билан йилнинг энг катта сектори ҳисобланмоқда.
Металл маҳсулотлари бўйича ҳам ижобий динамика кузатилди. Хусусан, мис прутлар экспорти деярли тўрт баравар кўпайиб, 124,5 миллион долларга етди. Бундай ўсиш саноат кооперацияси ва қайта ишлаш тармоқларидаги талабнинг ошиб бораётганини англатади.
Шу билан бирга, Қозоғистоннинг бошқа йирик бозорларида пасайиш қайд этилди: Европа давлатларига экспорт 8 фоизга, Россияга етказиб бериш эса 16 фоизга камайди. Бу ҳолат Марказий Осиё давлатлари билан савдо муносабатлари айниқса фаол ривожланаётганини кўрсатади.
Умуман олганда, Қозоғистон ва Ўзбекистон ўртасидаги иқтисодий ҳамкорлик янги босқичга кўтарилмоқда. Мавжуд тенденциялар икки мамлакат ўртасидаги савдо ҳажми яқин йилларда янада ортишини англатиб, минтақавий иқтисодий интеграцияни кучайтиришга хизмат қилади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
