Qozog‘iston va O‘zbekiston o‘rtasidagi savdo aylanmasi yildan yilga mustahkamlanib bormoqda. 2025 yilning yanvar–sentyabr oylari yakunlariga ko‘ra, qo‘shni davlatning O‘zbekistonga yo‘naltirgan eksport hajmi 2,5 milliard dollarga yetdi. Bu o‘tgan yilning shu davriga nisbatan salmoqli — 26 foizlik o‘sish demakdir. Ayniqsa, Markaziy Osiyoda Qozog‘iston mahsulotlarining asosiy xaridorlari qatorida bizning mamlakat yetakchi o‘rinni egallayotgani e’tiborga loyiq.
Eksport tarkibiga nazar tashlansa, qishloq xo‘jaligi mahsulotlari yetkazib berish hajmi keskin oshgani ko‘zga tashlanadi. Masalan, yumshoq bug‘doy eksporti bir yil ichida 20,2 foizga o‘sib, 479,4 million dollarlik ko‘rsatkichga yetdi. Bu raqam ikki davlat o‘rtasidagi oziq-ovqat xavfsizligi va xomashyo savdosidagi yangi tendensiyalarni aks ettiradi.
Qozog‘istondan keltirilayotgan kungaboqar va saflor yog‘i bo‘yicha ham rekord ko‘rsatkich qayd etildi — import hajmi bir necha barobarga o‘sib, 170,8 million dollarga yetdi. Bu esa 124,2 foizlik o‘sish darajasi bilan yilning eng katta sektori hisoblanmoqda.
Metall mahsulotlari bo‘yicha ham ijobiy dinamika kuzatildi. Xususan, mis prutlar eksporti deyarli to‘rt baravar ko‘payib, 124,5 million dollarga yetdi. Bunday o‘sish sanoat kooperatsiyasi va qayta ishlash tarmoqlaridagi talabning oshib borayotganini anglatadi.
Shu bilan birga, Qozog‘istonning boshqa yirik bozorlarida pasayish qayd etildi: Yevropa davlatlariga eksport 8 foizga, Rossiyaga yetkazib berish esa 16 foizga kamaydi. Bu holat Markaziy Osiyo davlatlari bilan savdo munosabatlari ayniqsa faol rivojlanayotganini ko‘rsatadi.
Umuman olganda, Qozog‘iston va O‘zbekiston o‘rtasidagi iqtisodiy hamkorlik yangi bosqichga ko‘tarilmoqda. Mavjud tendensiyalar ikki mamlakat o‘rtasidagi savdo hajmi yaqin yillarda yanada ortishini anglatib, mintaqaviy iqtisodiy integratsiyani kuchaytirishga xizmat qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
