Россиянинг арзон авиачипталар таклиф этувчи «Победа» авиакомпанияси Ўзбекистон билан ҳаво қатновларини кенгайтиришни режалаштирмоқда. Компания маълумотига кўра, 2025 йилнинг 28 февраль санасидан бошлаб Москва ва Термез шаҳарлари ўртасида мунтазам авиарейслар йўлга қўйилади. Айни йўналиш бўйича авиачипталар савдоси аллақачон очилган.
Режага мувофиқ, Москва–Термез йўналишидаги парвозлар ҳафтасига икки марта — сешанба ва шанба кунлари амалга оширилади. Бу эса Жанубий Ўзбекистонга саёҳат қилиш ёки иш юзасидан бориб-келишни режалаштираётган йўловчилар учун янада қулай имконият яратади.
Бундан ташқари, «Победа» авиакомпанияси 2025 йилнинг 7 март кунидан эътиборан Москва ва Нукус шаҳарлари ўртасида ҳам авиақатновларни бошлайди. Ушбу йўналишда рейслар чоршанба ва шанба кунлари амалга оширилиши белгиланган.
Чипта нархларига келсак, Москва–Термез йўналиши бўйича авиабилетлар 9,4 минг рублдан бошланади, бу тахминан 1,4 миллион сўмга тенг. Москва–Нукус йўналиши учун эса чипталарнинг энг кам нархи 10,3 минг рубл, яъни қарийб 1,5 миллион сўмни ташкил этади. Арзон тарифлар, айниқса, талабалар, меҳнат муҳожирлари ва иқтисодий саёҳатни афзал кўрувчи йўловчилар учун жозибалидир.
Маълумот ўрнида, «Победа» авиакомпанияси 2014 йил декабр ойидан бери фаолият юритиб келмоқда ва Россиядаги энг йирик лоукостерлардан бири ҳисобланади. У «Аэрофлот» гуруҳи таркибига киради. Компаниянинг асосий хаби Москва шаҳридаги Внуково аэропортида жойлашган бўлиб, у ердан Россия ички ва халқаро йўналишлар бўйича мунтазам рейслар амалга оширилади.
Янги очилаётган ушбу йўналишлар Ўзбекистон ва Россия ўртасидаги авиақатновлар географиясини янада кенгайтириб, йўловчилар учун қулай ва тежамкор саёҳат имкониятларини яратиши кутилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
