Өзбекстанда есірткіге қарсы күрес белгісі енгізіледі

Өзбекстанда есірткі қылмыстары мен нашақорлыққа қарсы күрес жүргізген азаматтар төсбелгілермен марапатталады. Бұл туралы үкімет қаулысы қабылданды.

Үміткерлер тізімін жыл сайын Есірткі заттары мен атыс қаруларына бақылау жасау агенттігі ұсынады. Марапаттау рәсімі жыл сайын 26 маусымда, Нашақорлыққа қарсы халықаралық күрес күніне орай өткізіледі.

Төсбелгі тек бір рет тапсырылады. Құжатта төсбелгіні тағу ережелері де көрсетілген — мемлекеттік марапаттардан кейін, кеуденің сол жағына тағылады.

Қараша айының басында Өзбекстан Президенті Шавкат Мирзиёев жастарды есірткіден қорғауға қатысты қаулыға қол қойған болатын. Соған сәйкес, есірткі таратқан және бұл қылмыстарды жасырушы тұлғаларға жазаны күшейту жоспарланған.

Сонымен қатар, нашақорлық пен токсикоманиямен ауырғандарды анықтау және емдеу жүйесін жаңарту бойынша шаралар әзірлеу белгіленген. “Zamin”-ді Telegram-нан оқыңыз!