Фото: Қауіпсіздік
Наманған облысында құрылыс саласына қатысты кезекті коррупциялық жағдай әшкереленді. Құқық қорғау органдары жүргізген жедел іс-шаралар нәтижесінде лауазымды тұлғалардың заңсыз әрекеттері анықталды.
Мәлім болғандай, Наманған облыстық Құрылыс және тұрғын үй-коммуналдық шаруашылық бас басқармасының екі бас маманы өзара келісіп әрекет еткен. Олар Жаңа Наманған ауданы аумағында орналасқан кәсіпкерге тиесілі екі қабатты тұрғын емес ғимарат бойынша құрылысқа рұқсат беру, сәулет-жоспарлау тапсырмасы мен жобалық құжаттарды оң шешіп беру үшін ірі мөлшерде ақша талап еткен.
Дереккөздердің хабарлауынша, шенеуніктер бұл қызметтері үшін барлығы 22 мың АҚШ долларын сұрап, осы жылдың наурыз айында алдын ала 7 мың доллар көлеміндегі қаражатты қабылдап алған.
Кейін Мемлекеттік қауіпсіздік қызметінің қызметкерлері Бас прокуратура жанындағы Департаментпен бірлесіп өткізген арнайы операция барысында олардың бірі қалған 15 мың АҚШ долларын алып жатқан кезінде ұсталды. Жедел іс-шара барысында ол айғақты заттармен қолға түсті.
Сондай-ақ, бұл қылмыстық іске қатысы бар екінші бас маман да іс жүргізу тәртібімен ұсталғаны хабарланды.
Қазіргі уақытта аталған факт бойынша қылмыстық іс қозғалып, тергеу амалдары жүргізіліп жатыр. Құзырлы органдар тарапынан барлық жағдайға құқықтық баға берілетін болады.
