Foto: Xavfsizlik
Namangan viloyatida qurilish sohasiga oid navbatdagi korrupsion holat fosh qilindi. Huquqni muhofaza qiluvchi organlar tomonidan oʻtkazilgan tezkor tadbirlar natijasida mansabdor shaxslarning noqonuniy harakatlari aniqlandi.
Maʼlum boʻlishicha, Namangan viloyati Qurilish va uy-joy kommunal xoʻjaligi bosh boshqarmasining ikki nafar bosh mutaxassisi oʻzaro kelishgan holda harakat qilgan. Ular Yangi Namangan tumani hududida joylashgan tadbirkorga tegishli ikki qavatli noturar bino boʻyicha qurilish ruxsatnomasi, arxitektura-rejalashtirish topshirigʻi hamda loyiha hujjatlarini ijobiy hal qilib berish evaziga katta miqdorda pul talab qilgan.
Manbalarga koʻra, mansabdorlar ushbu xizmatlari uchun jami 22 ming AQSH dollari soʻragan boʻlib, joriy yilning mart oyida avval 7 ming dollar miqdorida mablagʻni qabul qilib olgan.
Keyinchalik Davlat xavfsizlik xizmati xodimlari Bosh prokuratura huzuridagi Departament bilan hamkorlikda oʻtkazgan maxsus operatsiya davomida ulardan biri qolgan 15 ming AQSH dollarini olayotgan vaqtida qoʻlga tushirildi. Tezkor tadbir davomida u ashyoviy dalillar bilan ushlangan.
Shuningdek, ushbu jinoyat ishida ishtirok etgan ikkinchi bosh mutaxassis ham protsessual tartibda qoʻlga olingani maʼlum qilindi.
Hozirda mazkur holat yuzasidan jinoyat ishi qoʻzgʻatilgan boʻlib, tergov-surishtiruv ishlari izchil davom ettirilmoqda. Mutasaddi idoralar tomonidan barcha holatlarga huquqiy baho berilishi kutilmoqda.
