Наманганда 10 кун аввал ўғирлаб кетилган Қуръони Карим қўлёзмаси яна ўз жойига қайтарилди

^{Фото: Наманган милоят ИИБ матбуот хизмати}
Наманганда 10 кун аввал номаълум шахслар томонидан ўғирлаб кетилган ва ички ишлар ходимлари саъй-ҳаракати билан топилган Қуръони Карим қўлёзмаси яна ўз жойига қайтарилди. Бу ҳақда «Дарё» мухбири Азизбек Абдувалиев хабар бермоқда.

Вилоят ҳокими Шавкат Абдураззақов ва ҳуқуқ-тартибот идоралари раҳбарлари иштирокида қўлёзма Султон Увайс Қароний зиёратгоҳидаги ўз ўрнига жойлаштирилди. Шу ерга жам бўлган нуронийлар бундай кўнгилсиз ҳолатлар асло такрорланмаслигини тилаб, дуо қилишди.

^{Фото: Наманган милоят ИИБ матбуот хизмати}
Шавкат Абдураззақов ҳуқуқ-тартибот идоралари мутасаддиларига ушбу муқаддас китобни топишдаги жонбозликлари учун миннатдорлик билдирди ҳамда бир гуруҳ ички ишлар ходимларини бу борада кўрсатган хизматлари учун тақдирлади.

^{Фото: Наманган милоят ИИБ матбуот хизмати}
Вилоят ИИБ матбуот хизматининг маълум қилишича, Ўзбекистонда ҳажми жиҳатдан Қуръони Усмонийдан кейин иккинчи ўринда турадиган Мусҳаф энди мунтазам қўриқланади, бироқ зиёратчиларнинг ноёб қўлёзмани кўриш имконияти чекланмайди.