Тошкент метросининг «Мингўрик» бекатидан «Абу Сахий»гача янги йўналиш қурилиши мумкин
Тошкент метрополитенида янги йўналиш қурилиши режалаштирилмоқда. Маълум қилинишича, метронинг «Мингўрик» бекатидан «Чилонзор буюм бозори»гача бўлган янги линияси барпо этилиши мумкин.
Ҳозирда мазкур йўналиш бўйича лойиҳа ҳужжатларини ишлаб чиқиш ва қурилиш имкониятларини баҳолаш ишлари олиб борилмоқда. Бу ҳақда Президент Шавкат Мирзиёевга пойтахт метрополитенида хизмат кўрсатиш сифатини яхшилаш ҳамда инфратузилмадан фойдаланиш самарадорлигини ошириш юзасидан тақдим этилган таклифлар доирасида маълум қилинди.
Режага кўра, лойиҳа икки босқичда амалга оширилиши мумкин. Биринчи босқичда «Мингўрик — Жанубий вокзал» йўналишини қуриш, иккинчи босқичда эса ушбу тармоқни «Жанубий вокзал»дан «Чилонзор буюм бозори»гача узайтириш имкониятлари ўрганилади.
Агар лойиҳа амалга ошса, метро тармоғи Абу Сахий бозори томонгача етиб боради. Бу эса ушбу ҳудудга қатновни анча енгиллаштириши кутилмоқда.
Мутахассислар фикрича, янги линия шаҳарнинг жанубий қисмидаги транспорт юкламасини камайтириш, тирбандликни қисқартириш ва йирик савдо мажмуаларига боришни қулайлаштиришга хизмат қилади.
