Сурхондарёда Салжуқийлар даврига тегишли олтин динор топилди (фото)

^{Фото: Сурхондарё вилояти ҳокимлиги ахборот хизмати}
Сурхондарё вилояти ҳокимлиги ахборот хизматининг хабар беришича, Термиз тумани Дўстлик маҳалласида яшовчи Улкан Эралиев ўзига тегишли боғни суғориш чоғида ердан сариқ металл парчасини топиб олган ва бу ҳақда Термиз археология музейига мурожаат қилган.

^{Фото: Сурхондарё вилояти ҳокимлиги ахборот хизмати}
Мутахассислардан иборат гуруҳ топилма аниқланган жойда дастлабки иш жараёнини олиб бориб, Қорахонийлар ва Салжуқийлар даврига оид кулолчилик буюмлари парчаларини топган.

У.Эралиев қимматбаҳо топилмани Термиз археология музейига топширган. Унга амалдаги қоидаларда белгиланган ҳақ тўлаб берилган. Музей мутахассислари ва нумизматлари томонидан қимматбаҳо топилма дастлабки экспертизадан ўтказилган.

^{Фото: Сурхондарё вилояти ҳокимлиги ахборот хизмати}
Мутахассислар олтин динорнинг олд томонига «Аллоҳ» ва «Муҳаммад» сўзлари ёзилганини, орқа томонидаги ёзув деярли ўчиб кетганини аниқлашган. Шикастланган, лекин яхши сақланиб қолган танга – олтин динорнинг оғирлиги 1,92 граммни ташкил этган.