Ахсикентда VIII аср қўлёзма ва Аббосийлар даври тангалари топилди
Ахсикент археология парки ҳудудида яна бир тарихий топилма жамоатчилик эътиборини тортди. Янги Ахси мажмуаси фонди ноёб буюмлар билан бойиди. Бу сафар хазинага VIII асрга оид 68 та қадимий танга ва 27 та қўлёзма китоб қўшилди.
Археопарк раҳбари Анвар Икромнинг таъкидлашича, Аббосийлар ҳукмронлиги даврига тегишли кумуш тангаларда ўша даврга хос ноёб безаклар ва араб ёзувидаги мукаммал хатлар кўзга ташланади.
Шунингдек, топилган қўлёзмаларда ҳандаса, риёзиёт, астрономия ва тиббиётга оид жуда қимматли маълумотлар жамланган. Улар орасида Сомоний ва Қорахоний сулолалари даврида чиқарилган тангалар, шунингдек 1667–1670 йилларда Швеция, 1836 йилда эса Буюк Британияда зарб этилган намуна тангалар ҳам бор.
Мутахассислар таъкидлашича, илк кумуш тангалар милоддан аввалги III асрга бориб тақалади. Уларнинг олдинги қисми — аверсига ҳукмдор сурати, орқа қисми — реверсига эса рамзий тасвирлар, подшоларнинг исми ва тамғалари туширилган бўлган.
Айни вақтда Ахсикент комплекс экспедицияси Яккайигит боғида — Умаршайх Мирзонинг резиденцияси ҳисобланган ҳудудда қазишмалар олиб бормоқда. Янги топилмалар нафақат маҳаллий аҳоли, балки кенг жамоатчилик ва олимлар орасида ҳам катта қизиқиш уйғотди.
Бу кашфиёт яна бир бор Ахсикентнинг тарихий марказ сифатида нақадар бой маданий ва илмий меросга эгалигини кўрсатди.
