Жалолиддин Аҳмадалиевнинг концерт чипталари нега қиммат?

Ўзбек эстрадаси вакили Жалолиддин Ахмадалиев концерт чипталари нега қимматлиги ҳақида кўпчиликни қизиқтираётган саволга очиқча жавоб берди.

Хонанданинг айтишича, у бу саволни жуда кўп эшитган ва ҳатто бу ҳақда гапиришдан чарчаганини ҳам яширмади. Унинг таъкидлашича, кўпчилик “чипталаринг жуда қиммат” деб гапиришади, аммо аслида бу масалада у тўғридан-тўғри иштирок этмайди.

Хонанда шундай дейди: концертларни ташкил этувчи ташкилотлар у билан 5 йилгача шартнома имзолайди. Айнан шу ташкилотчилар махсус режа ва график асосида чипта нархларини белгилайди ва уларни кассаларга, онлайн платформаларга жойлаштиради. Бу жараёнда хонанданинг нархларга дахли йўқ.

У ўз сўзларида концерт жараёнини тўйга қиёслаб, фақат чиқиш қилиб кетишини таъкидлади. Яъни, у тадбирга келиб, 2–3 соат давомида жонли ижро қилади ва шундан сўнг кетади.

Шунингдек, декорация, саҳна безаклари ва бошқа ташкилий масалалар унинг номидан бўлишини айтди. Хонанда фақат ўз жамоаси — созандалари билан келиб, чиқиш қилиб, яна қайтиб кетишини қўшимча қилди.

Шу тариқа, Жалолиддин Ахмадалиев концерт чипталари нархига шахсан алоқаси йўқлигини яна бир бор таъкидлади.