«Бока Хуниорс» клубида янги спорт директори тайинланди

Аргентинанинг «Бока Хуниорс» клуби спорт директори лавозимига янги номзодни эълон қилди — бу вазифани Марсело Делгадо бажаради. У клуб президенти, собиқ «Барселона» футболчиси Хуан Рикельме билан яқин ҳамкорликда ишлайди. Бу ҳақда euro-football.ru хабар беради.

Клуб таркибини тезкор кучайтиришга эҳтиёж сезмоқда, шу боис Делгадо ва Рикельме олдида жамоани зарур трансферлар билан мустаҳкамлаш бўйича муҳим вазифалар турибди.

Делгадо футболчилик фаолиятида ҳам катта тажриба тўплаган: у Аргентина терма жамоасида 1995–2002 йиллар оралиғида 18 та учрашувда майдонга тушган ва 1998 йилги жаҳон чемпионати ўйинларида ҳам қатнашган.

Шунингдек, 2003 йилда у Либертадорес кубогининг энг яхши тўпурари бўлган — «Сантос» ҳужумчиси, бразилиялик Рикардо Оливейра билан бирга энг кўп гол урган футболчи сифатида қайд этилган.