ОФК Осиё Чемпионлар Лигаси ўйинларини БАА ва Қатарда кечиктирди

Осиё футбол конфедерацияси (ОФК) Абу-Даби, Дубай ва Доҳада ўтказилиши керак бўлган минтақавий Осиё Чемпионлар Лигаси учрашувлари бошқа муддатга қолдирилганини маълум қилди. Бу ҳақда euro-football.ru хабар беради.

Қарорга Эрон, АҚШ ва Исроил ўртасидаги ҳарбий таранглик сабаб бўлди. Хусусан, Эрон томонидан учирилаётган снарядлар айрим қўшни ҳудудларга ҳам етиб бораётгани, у ерда АҚШ ҳарбий базалари жойлашгани хавотирларни кучайтирди.

ОФК баёнотида ташкилот вазиятни яқиндан кузатишда давом этиши, футболчилар, жамоалар, расмийлар ҳамда мухлислар хавфсизлигини таъминлаш масаласида қатъий позицияда қолиши таъкидланди.

Ўйинлар 2 ва 3 март кунлари ўтказилиши керак эди. Ҳозирча учрашувларнинг янги санаси ёки ўтказиладиган жойи бўйича аниқ маълумот берилмади.