Эндрикк Лён билан хайрлашди: Арслон бир жойда қола олмайди
Бразилиялик иқтидор эгаси Эндрикк Франциянинг Лён жамоаси мухлислари билан ҳиссиётларга бой тарзда хайрлашди. Реал Мадрид клубига тегишли бўлган 19 ёшли ҳужумчи олти ойлик ижара муддатини якунлаб, янги мавсум олдидан Сантиаго Бернабеу стадионига қайтишга тайёргарлик кўрмоқда. Бу ҳақда Goal.com хабар беради.
Испанияда ўйин амалиёти камлигидан қийналган Эндрикк Лён сафида ўзининг энг яхши формасини тиклаб олди. У ижтимоий тармоқларда эълон қилган видолашув видеосида Франциядаги ўсиши ҳақида тўхталиб ўтди. Ленс жамоасига қарши сўнгги баҳсда Групама Стадиум мухлислари уни тик туриб олқишлар билан кузатиб қўйишди, бу эса қисқа вақт ичида футболчи ва мухлислар ўртасида кучли боғлиқлик юзага келганини кўрсатади.
"Бразилияда қийин кунларни бошдан кечираётган одам ҳақида 'ҳар куни битта арслонни ўлдириши керак' дейишади. Мен эса арслонни ўлдирмасликка, балки унинг ўзига айланишга қарор қилдим. Айнан шу ерда ўз кучимни тиклаш учун керакли нарсани топдим. Арслон каби ҳужум қилишни ва оиламни ҳимоя қилишни ўргандим", — деди бразилиялик юлдуз ўз мурожаатида.
Ижара муддати барча томонлар учун муваффақиятли кечди. Эндрикк 21 та учрашувда 8 та гол ва 8 та ассист қайд этиб, Лён жамоасининг чемпионатда тўртинчи ўринни эгаллашига катта ҳисса қўшди. Футболчи Франциядаги саргузаштлари шунчалик ҳайратланарли бўлдики, бу ҳақда ҳатто фильм ишлаш мумкинлигини таъкидлади.
Энди Эндрикк Реал Мадрид ихтиёрига қайтади. Маълумотларга кўра, у келаси мавсумда Мадрид клуби бошқарувига қайтиши кутилаётган Хосе Моуриньо қўл остида тўп суриши мумкин. "Афсуски, арслон бир жойда қола олмайди. Мен кетишим керак, лекин бу шаҳарни бутун умр қалбимда сақлайман", — дея сўзини якунлади ҳужумчи.
