Алиссон Ливерпулни тарк этадими: Жон Арне Риисе кутилмаган огоҳлантириш билан чиқди
Ливерпул дарвозабони Алиссон атрофида кутилмаган трансфер миш-мишлари урчимоқда. Бироқ Мерсисайд клубининг собиқ юлдузи Жон Арне Риисе ГОАЛ нашрига берган интервюсида бразилиялик посбоннинг 2026-йилда жамоани тарк этиши нега даргумон эканлигини тушунтириб берди. Тажрибали дарвозабон Энфилдда саккиз йиллик унутилмас даврни ўтказди ва амалдаги шартномага эга бўлишига қарамай, унинг келажаги сўроқ остида қолмоқда. Бу ҳақда Goal.com хабар беради.
2018-йилда Юрген Клопп ишончли ҳимоя қўрғонини қидираётган бир пайтда, Ливерпул скаутлари Алиссон номзодида тўхталишган эди. Ўшанда Рома клубидан 67 миллион фунт стерлинг эвазига амалга оширилган трансфер уни дунёдаги энг қиммат дарвозабонга айлантирганди. Самба юлдузи Англия Премер-лигасига тезда мослашиб, сайёрамизнинг энг яхши посбонларидан бири деган номга сазовор бўлди.
Алиссон Ливерпул сафида 330 дан ортиқ ўйинда майдонга тушди ва ҳатто 2021-йилда Вест Бромвич дарвозасига ғалаба голини киритиб, драматик лаҳзаларни тақдим этди. У қизиллар билан икки марта Англия Премер-лигаси, Чемпионлар лигаси, Англия кубоги ва клублар ўртасидаги жаҳон чемпионатида ғолиб чиқди. Эндиликда унинг Италияга, хусусан, Ювентус клубига қайтиши ҳақида гап-сўзлар тарқалмоқда.
Собиқ ҳимоячи Риисе ушбу миш-мишларга муносабат билдирар экан, шундай деди: “Унинг кетишини тасаввур қила олмайман, чунки у ақлбовар қилмас даражадаги ўйинчи. У клуб, футболчилар ва ҳимоямиз учун жуда муҳим. Агар у кетса, унинг ўрнига кимни олиб келасиз? Унинг даражасида ким бор? Ҳеч ким. Агар яна жуда катта маблағ сарфлашни истамасангиз, унинг кетишига имкон йўқ”.
Алиссоннинг шартномаси якунланишига ҳали вақт бор, бироқ Энфилдда бошқа йирик кетишлар тасдиқланган. Мисрлик суперюлдуз Муҳаммад Салах шартномасининг сўнгги йилида жамоани тарк этиши кутилмоқда, Ибраҳима Конате эса келишувни узайтиришдан бош тортди. Шунингдек, Андй Робертсон ҳам эркин агентга айланиши мумкин бўлган футболчилар қаторида турибди.
