Google Pixel смартфонлари учун ялтироқ диско-бол пиктограммаларини чиқарди
Google компанияси жума куни смартфонлар экранлари учун мўлжалланган янги диско-бол услубидаги пиктограммалар тўпламини тақдим этди. Бу қадам Spotify ўзининг 20 йиллигини нишонлаш мақсадида вақтинча жорий этган, бироқ фойдаланувчилар томонидан кескин танқид қилинган (ва баъзилар томонидан олқишланган) ялтироқ иконкасидан сўнг амалга оширилди. Google бу ҳазилга қўшилишга қарор қилди ва Android фойдаланувчилари учун ўхшаш мавзудаги махсус пиктограммаларни эълон қилди. Бу ҳақда Techcrunch.com хабар беради.
Android экотизими раҳбари Самеер Самат Х ижтимоий тармоғида шундай ёзди: “Сизнинг хоҳишингиз — биз учун буйруқ. Диско пиктограммалари бугундан бошлаб Pixel қурилмаларида мавжуд... Буни ҳақиқатан ҳам хоҳлаётганингизга ишончингиз комилми?”. У ўз постига Pixel телефонининг скриншотини илова қилди, унда барча иловалар ялтироқ диско-бол кўринишига келганини кўриш мумкин.
Янги пиктограммалар Pixel смартфонларининг яқинда тақдим этилган махсус иконкаларни созлаш функцияси орқали мавжуд. Ушбу функция фойдаланувчиларга AI ёрдамида яратилган турли услубларни танлаш имконини беради. Бунгача фойдаланувчилар фақат пиктограмма рангларини фон расми мавзусига мослаштира олишар эди, холос.
Ушбу функция март ойидаги Pixel Дроп янгиланиши билан бирга тақдим этилган бўлиб, унда қўлда чизилган “Скрибблес”, олтин рангли “Треасуре” ва ранг-баранг “Эасел” каби услублар мавжуд эди. Ҳафта бошида Самеер Самат ҳазил тариқасида Chrome браузерининг диско-бол кўринишидаги расмини улашиб, бундай тўпламни чиқариш ҳақида сўров ўтказган эди.
Гарчи кўпчилик Spotify иконкасини “хунук” деб атаган бўлса-да, Google бу ғояни ҳаётга татбиқ этди. Spotify эса ўз навбатида ялтироқ дизайн ҳамма учун ҳам эмаслигини тан олиб, бу ўзгариш вақтинчалик эканини фойдаланувчиларга эслатиб ўтди.
