TSMC Япониядаги заводи орқали илк бор фойдага кирди
TSMC компанияси Япониядаги ўз заводини илк бор фойдали даражага олиб чиқди. Кумамотода жойлашган ва Жапан Адвансед Семикондуктор Мануфактуринг (ЖАСМ) номи билан юритиладиган қўшма корхона жорий йилнинг биринчи чорагида қарийб 30 миллион доллар соф фойда кўрди. Аввалги даврларда зарар билан ишлаган ушбу заводнинг муваффақияти ишлаб чиқариш қувватларининг тўлиқ юкланиши билан изоҳланмоқда. Бу ҳақда Ixbt.com хабар беради.
Ҳозирда ушбу завод автомобилсозлик ва саноат сектори учун 12, 16, 22 ва 28 нанометрли чипларни ишлаб чиқармоқда. Компания Японияда иккинчи завод қурилишини ҳам бошлаб юборган. Дастлаб 6 нанометрли технологияга мўлжалланган ушбу лойиҳа сунъий интеллект ва юқори унумдор процессорларга бўлган талаб ортгани сабабли 3 нанометрли технологияга мослаштирилмоқда.
АҚШдаги фаолият ҳам жадал ривожланмоқда. TSMC Аризона бўлинмаси биринчи чоракда 600 миллион долларга яқин фойда қайд этди. Ҳозирда компания АҚШда учинчи завод қурилишини бошлаган ва тўртинчи объект учун майдон тайёрламоқда. АҚШдаги лойиҳаларга киритилган умумий инвестициялар ҳажми 165 миллиард долларни ташкил этади.
Европада эса вазият бироз бошқача: Германиянинг Дрезден шаҳрида қурилаётган Эуропеан Семикондуктор Мануфактуринг Ко. заводи ҳали ҳам қурилиш босқичида бўлиб, компания учун харажат манбаи бўлиб қолмоқда. TSMC глобал миқёсда ўз ишлаб чиқариш географиясини кенгайтириш орқали Тайванга бўлган қарамликни камайтириш ва сунъий интеллект чипларига бўлган глобал талабни қондиришни мақсад қилган.
