Google ТВ платформаси 300 миллион фаол қурилмалар маррасини забт этди
Google И/О 2026 конференциясида дунё бўйлаб Google ТВ ва Android ТВ тизимларида ишловчи фаол қурилмалар сони 300 миллионга етгани расман эълон қилинди. Ушбу кўрсаткич платформанинг глобал миқёсдаги кенг қулоч ёйганидан далолат беради. Бу ҳақда Ixbt.com хабар беради.
Бироқ, статистик маълумотлар ўсиш суръатларининг сезиларли даражада секинлашганини кўрсатмоқда. Масалан, 2023-йилда фаол қурилмалар сони 150 миллионни ташкил этган бўлса, орадан бир ярим йил ўтиб бу рақам 270 миллионга етган эди. Охирги ҳисобот даврида эса ўсиш бор-йўғи 11 фоизни ташкил этди, бу аввалги йиллардаги натижалардан анча пастдир.
Экспертларнинг фикрича, бундай пасайиш смарт-телевизорлар бозоридаги тўйиниш билан боғлиқ. Аввалроқ кўплаб йирик брендлар ўзларининг хусусий операцион тизимларидан воз кечиб, Google ТВ платформасига ўтган эди, бу эса кескин сакрашни таъминлаган. Ҳозирда эса бозор барқарорлашув босқичига кирди.
Гарчи Google ТВ Европа каби минтақаларда етакчи куч бўлиб қолаётган бўлса-да, таҳлилчилар яқин йилларда унинг бозор улуши бироз қисқариши мумкинлигини тахмин қилмоқдалар. Рақобатнинг кучайиши ва муқобил платформаларнинг ривожланиши Google учун янги чақириқларни юзага келтирмоқда.
