Ақлли узуклар ишлаб чиқарувчиси Oura ИПО ўтказиш учун ариза берди
Ҳафта давомида SpaceX компаниясининг ИПО режалари асосий эътиборда бўлган бўлса-да, Elon Musk компаниясидан ташқари яна бир таниқли бренд очиқ бозорга чиқишга қарор қилди. Финляндиянинг ақлли узуклар ишлаб чиқарувчи Oura компанияси пайшанба куни АҚШ Қимматли қоғозлар ва биржа комиссиясига (SEК) ИПО ўтказиш учун махфий равишда С-1 шаклидаги аризасини топширганини маълум қилди. Бу ҳақда Techcrunch.com хабар беради.
2015-йилда асос солинган Oura бугунги кунда саломатликни кузатувчи энг оммабоп гаджетлар ишлаб чиқарувчилардан бирига айланди. Компания ўзининг ихчам ва қулай узуклари билан Fitbit, Garmin ҳамда Apple каби брендларнинг соат кўринишидаги маҳсулотларидан ажралиб туради. Oura узуги фойдаланувчининг жисмоний фаоллиги, уйқу сифати ва кундалик тайёргарлик даражасини кузатиб боради.
Компания ўтган йилнинг сентябрь ойида ўтказилган Сериес Э инвестиция босқичида жами 5,5 миллион дона узук сотганини маълум қилган эди. Бу кўрсаткич бир йил аввалги 2,5 миллионлик натижадан сезиларли даражада юқори. Ўша босқичда Oura 875 миллион доллар маблағ жалб қилиб, ўз қийматини 11 миллиард долларга етказган эди. Бу 2024-йил бошидаги 5 миллиард долларлик баҳолашдан икки баравар кўп демакдир.
Oura ўзининг аёл мижозлари базасини кенгайтириш мақсадида яқинда аёллар саломатлигига ихтисослашган хусусий AI моделини ҳам тақдим этди. Компаниянинг биржага чиқиши тақиладиган технологиялар бозорида рақобат янада кучайишидан далолат беради.
