Тошкентда қуриладиган бизнес-авиация аэропорти учун 140 млн доллар ажратилади

Тошкент шаҳрида бизнес-авиация аэропорти қурилишига 140 миллион доллар йўналтирилади. Бу ҳақда Дарё хабар бермоқда.

2018—2020 йилларда соатига 250 кишига хизмат қиладиган йўловчи терминали қурилади, учиш-қўниш майдони таъмирланади, парвозлар радиотехник таъминоти ва аэродром фаолияти учун зарур хизматлар ишга туширилади.

Бу ишларнинг қиймати 140 миллион доллар баҳоланмоқда. Молиялаштириш хорижий молия институтлари кредитлари ва лойиҳа буюртмачиси — «Ўзбекистон темир йўллари» маблағи ҳисобидан амалга оширилади.

Кейинчалик аэропортда қўшимча бино ва иншоотлар, жумладан, меҳмонхона қурилади.

Эслатиб ўтамиз, олдинроқ «Тошкент-Шарқий аэродроми» ва «Тошкент механика заводи» (собиқ ТАПОиЧ) ҳудудининг бир қисми «Ўзбекистон темир йўллари»га берилгани билдирилганди.