Airbnb tomonidan qoʻllab-quvvatlanadigan WeRoad 58 million dollar investitsiya jalb qildi
Milanda asos solingan WeRoad startapi Airbnb boshchiligidagi C seriyali investitsiya raundida 58 million dollar mablagʻ toʻpladi. Ushbu sarmoya kompaniyaning umumiy kapitalini qariyb 100 million dollarga yetkazdi. Mazkur mablagʻlar platformaning Yevropadan tashqaridagi ilk yirik kengayishi — AQSH bozoriga, xususan, Ostin shahriga kirib borishi uchun yoʻnaltiriladi. Bu haqda Techcrunch.com xabar beradi.
Yangi investitsiya sayohat sanoatidagi navbatdagi avlod kompaniyalari shunchaki bron qilish platformasi emas, balki real hayotdagi aloqalarni osonlashtiradigan ijtimoiy tarmoq koʻrinishida boʻlishiga tikilgan garovdir. WeRoad oʻzini tobora ommalashib borayotgan “IRL (In Real Life) iqtisodiyoti”ning bir qismi sifatida koʻrsatmoqda. Bu yoʻnalishdagi startaplar foydalanuvchilarning ekran qarshisida oʻtkazadigan vaqtini emas, balki oflayn muloqot va uchrashuvlarni monetizatsiya qilishga eʼtibor qaratadi.
Kompaniya asoschilari Paolo De Nadai, Fabio Bin va Erika De Santi guruhli sayohatlarni umumiy qiziqishlar atrofida qayta loyihalashtirishdi. WeRoad sayohatlari asosan Milleniallar va Gen Z vakillari uchun moʻljallangan boʻlib, ishtirokchilar yoshi va madaniy qarashlariga koʻra guruhlanadi. Sayohat boshlanishidan oldin sayyohlar WhatsApp guruhiga qoʻshiladi, bu esa ularga bir-birlari bilan oldindan tanishish imkonini beradi.
Guruhlar odatda 8 tadan 15 tagacha sayyohni oʻz ichiga oladi va marshrutlar ijtimoiy dinamikani hisobga olgan holda tuziladi. Masalan, ishtirokchilar oʻrtasidagi “muzlarni eritish” uchun sarguzashtli tadbirlar safarning ilk kunlariga rejalashtiriladi. Maʼlumotlarga koʻra, mijozlarning qariyb 60 foizi birinchi sayohatdan soʻng platforma orqali yana qayta buyurtma berishadi.
