Xiaomi 40 soatgacha ishlaydigan arzon portativ ventilyatorni taqdim etdi
Xiaomi kompaniyasi issiq ob-havoda koʻchada foydalanish uchun moʻljallangan yangi Xiaomi Mijia Handheld Fan portativ ventilyatorini namoyish qildi. Qurilma hozirda kraudfanding doirasida taxminan 169 yuan (taxminan 24 dollar) narxida sotuvga chiqarilgan. Bu haqda Ixbt.com xabar beradi.
Yangi gadjetning asosiy oʻziga xosligi uning avtonom ish faoliyatidir: 5000 mA·sh sigʻimli oʻrnatilgan akkumulyator tanlangan rejimga qarab 40 soatgacha xizmat qilishi mumkin. Qurilma USB-C porti orqali quvvatlanadi va tezkor quvvatlash funksiyasini qoʻllab-quvvatlaydi — kompaniya maʼlumotlariga koʻra, 10 daqiqalik quvvatlanish 4 soatlik ish uchun yetarli boʻladi.
Ventilyator 100 darajali intensivlikka ega boʻlgan pogʻonasiz tezlikni tartibga solish tizimi bilan jihozlangan. Havo oqimining maksimal tezligi soniyasiga 8,5 metrga yetadi, puflash masofasi esa 5 metrgacha boradi. Bu esa qurilmadan hatto ochiq havoda ham samarali foydalanish imkonini beradi.
Qurilmaning ogʻirligi taxminan 260 grammni tashkil etadi, toʻplamda uni olib yurish uchun maxsus tasmacha va ixcham korpus koʻzda tutilgan. Shuningdek, ventilyatordagi kichik displey orqali quvvat darajasi va joriy ish rejimini kuzatib borish mumkin.
