Rossiyada aloqa operatorlari foydalanuvchilar haqida koʻproq maʼlumot toʻplaydi
Rossiya Raqamli rivojlanish vazirligi aloqa tarmoqlari egalari va axborot tarqatish tashkilotchilari uchun tezkor-qidiruv tadbirlarini oʻtkazish boʻyicha yangilangan talablarni eʼlon qildi. Yangi buyruqqa koʻra, SORM (tezkor-qidiruv tadbirlarini taʼminlash texnik tizimi) orqali qidirilishi lozim boʻlgan maʼlumotlar koʻlami sezilarli darajada kengaytirildi. Bu haqda Ixbt.com xabar beradi.
Endilikda aloqa operatorlari vakolatli organlar soʻroviga koʻra fuqarolar va tashkilotlarni batafsil identifikatsiya qilish imkonini beruvchi maʼlumotlarni toʻplashi shart. Ushbu roʻyxatga pasport maʼlumotlari, yashash manzillari, STIR (INN), bank hisob raqamlari rekvizitlari, IP-manzillar, loginlar, domenlar hamda aniq geolokatsiya maʼlumotlari kiritilgan.
Vazirlik ushbu choralarni milliy xavfsizlikni taʼminlash uchun zarur deb hisoblamoqda. Biroq, telekommunikatsiya bozori ekspertlarining taʼkidlashicha, yangi qoidalar tarmoq infratuzilmasi egalaridan dasturiy taʼminotni tubdan qayta yozishni va katta hajmdagi maʼlumotlarni saqlash uchun yanada kuchli serverlar sotib olishni talab qiladi.
Islohot, ayniqsa, kichik mintaqaviy kompaniyalarga ogʻir zarba berishi kutilmoqda. Minimal dasturiy-apparat majmuasini joriy etish narxi 5 million rubldan boshlanishini hisobga olsa, koʻplab lokal operatorlar uchun bu talablar moliyaviy jihatdan imkonsiz boʻlib qolishi mumkin.
Vaziyatdan chiqish yoʻli sifatida mutaxassislar "SORM autsorsingi" modelini taklif qilmoqdalar. Bunda yirik operatorlar oʻzlarining sertifikatlangan tizimlari orqali kichik provayderlar maʼlumotlarini pullik asosda uzatishni yoʻlga qoʻyadi. Tizim arxitekturasi yirik operatorning begona maʼlumotlarga toʻgʻridan-toʻgʻri kirishini cheklashni kafolatlaydi.
