Bryusselda Saida Mirziyoyeva va YEI komissari muhim uchrashuv o‘tkazdi
O‘zbekiston prezidenti administratsiyasi rahbari Saida Mirziyoyeva Bryusselda bo‘lib o‘tgan tashrifi doirasida Yevropa Ittifoqining xalqaro hamkorlik bo‘yicha komissari Yozef Sikela bilan muzokara o‘tkazdi.
Suhbat chog‘ida O‘zbekiston va Yevropa Ittifoqi o‘rtasidagi munosabatlarni yanada mustahkamlash va yangi loyihalarni amalga oshirish masalalari muhokama qilindi.
Ayni vaqtda ikki tomonlama aloqalar siyosiy, iqtisodiy, investitsiyaviy hamda madaniy-gumanitar yo‘nalishlarda faol rivojlanmoqda. Uchrashuvda, xususan, qo‘shma tashabbuslar va amaliy loyihalarni ilgari surishga alohida e’tibor qaratildi.
Saida Mirziyoyevaning ta’kidlashicha, Markaziy Osiyo miqyosida ochilayotgan yangi imkoniyatlardan samarali foydalanish ikki tomon uchun ham muhim ahamiyatga ega.
— Hamkorlik yo‘lida ochilayotgan yangi imkoniyatlarni to‘liq ishga solish muhim. Biz Yevropa Ittifoqi bilan sheriklikni yanada kengaytirishga sodiqligimizni yana bir bor tasdiqladik, — dedi Mirziyoyeva.
Uchrashuv so‘nggi yillarda O‘zbekiston va Yevropa Ittifoqi o‘rtasidagi muloqot yangi bosqichga ko‘tarilayotganini, ikki tomon ham uzoq muddatli strategik sheriklikni mustahkamlashga intilayotganini yana bir bor namoyon etdi.
