2025-йил 3-ноябрь куни Италия А Серияси марказий ўйинида "Милан" ўз майдонида "Рома"ни 1:0 ҳисобида мағлубиятга учратди. Ўйиннинг ягона голи биринчи бўлимда Павлович томонидан киритилди.
Якунда эса Милан дарвозабони Майк Менян қаҳрамонга айланди — у Пауло Дибаладан белгиланган пенальти зарбасини қайтарди. Ўйин бошидан "Рома" фаол босим ўтказишга ҳаракат қилди, лекин биринчи самарали ҳужум мезбонлар томонидан амалга оширилди.
39-дақиқада Рафаэл Леау чап қанотдан тезлик билан ўтиб, тўпни Павловичга узатди. У эса яқин масофадан дарвозага аниқ зарба йўллади — 1:0.
Гол киритилгач, "Милан" янада ишончлироқ ўйнай бошлади, аммо "Рома" ҳам бир неча хавфли вазиятлар яратди. Пауло Дибала ва Франса жарима майдони ичида икки марта зарба берди, лекин Менян ўз дарвозасини ишончли ҳимоя қилди.
Мезбонлар рақибнинг қарши ҳужумларига йўл қўймаслик учун ўз мудофаасини пухта ташкил қилди. Иккинчи бўлимда "Рома" босимни кучайтирди.
Аллегри ўйиннинг марказида ўзгаришлар қилиб, Рубен Лофтус-Чикни майдонга туширди. Гасперини эса Дибала ва Бейлини сафарбар этди.
80-дақиқада ҳакам Фофанинг қўли билан ўйнагани учун "Рома" фойдасига пенальти белгиланди, аммо Дибаладан чап томонга йўналтирилган зарбани Менян қайтариб, ўйиндаги энг муҳим вазиятни ҳал қилди. "Милан" Леау ва Нкунку орқали қарши ҳужумлар уюштирди, лекин иккинчи голни уришга муваффақ бўлмади.
Ўйин сўнгида Аллегри мудофаани мустаҳкамлаш учун Атекомени майдонга туширди ва "россонерилар" ўйинни муваффақиятли якунлашди.
