2025 yilning yanvar–noyabr oylarida O‘zbekiston tashqi bozordan banan xaridini sezilarli darajada ko‘paytirdi. Davlat statistika qo‘mitasining dastlabki ma’lumotlariga ko‘ra, ushbu davrda mamlakatga jami 161,4 ming tonna banan import qilingan. Bu mahsulotlar uchun umumiy hisobda 54,3 million AQSH dollari sarf etilgan.
Tahlillarga ko‘ra, banan importi hajmi o‘tgan yilning shu davri bilan solishtirilganda 10,8 ming tonnaga oshgan. Bu esa aholi orasida ushbu mevaning iste’moli barqaror o‘sib borayotganini ko‘rsatadi. Banan nafaqat arzon va to‘yimli, balki kundalik ratsionamizda tobora mustahkam o‘rin egallamoqda.
Banan yetkazib berishda O‘zbekistonning eng yirik hamkori sifatida Ekvador yetakchilik qilmoqda. Aynan ushbu mamlakatdan 145,9 ming tonna banan olib kirilgan bo‘lib, umumiy importning asosiy qismi shu davlat hissasiga to‘g‘ri keladi. Ekvador bananlari sifati va barqaror yetkazib berish tizimi bilan ajralib turadi.
Shu bilan birga, Xitoydan ham 13,9 ming tonna banan import qilingan. Qozog‘iston, Turkiya va Qirg‘iziston kabi davlatlardan esa nisbatan kam miqdorda — jami hisobda 300 tonnadan ortiq banan keltirilgan.
Qisqasi, banan bozorida O‘zbekistonning import geografiyasi kengayib bormoqda, ammo asosiy yo‘nalish hali ham Ekvador bo‘lib qolmoqda. Ko‘rinib turibdiki, sariq mevaga bo‘lgan muhabbat hali uzoq davom etadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
