2025 йилнинг январ–ноябр ойларида Ўзбекистон ташқи бозордан банан харидини сезиларли даражада кўпайтирди. Давлат статистика қўмитасининг дастлабки маълумотларига кўра, ушбу даврда мамлакатга жами 161,4 минг тонна банан импорт қилинган. Бу маҳсулотлар учун умумий ҳисобда 54,3 миллион АҚШ доллари сарф этилган.
Таҳлилларга кўра, банан импорти ҳажми ўтган йилнинг шу даври билан солиштирилганда 10,8 минг тоннага ошган. Бу эса аҳоли орасида ушбу меванинг истеъмоли барқарор ўсиб бораётганини кўрсатади. Банан нафақат арзон ва тўйимли, балки кундалик рационамизда тобора мустаҳкам ўрин эгалламоқда.
Банан етказиб беришда Ўзбекистоннинг энг йирик ҳамкори сифатида Эквадор етакчилик қилмоқда. Айнан ушбу мамлакатдан 145,9 минг тонна банан олиб кирилган бўлиб, умумий импортнинг асосий қисми шу давлат ҳиссасига тўғри келади. Эквадор бананлари сифати ва барқарор етказиб бериш тизими билан ажралиб туради.
Шу билан бирга, Хитойдан ҳам 13,9 минг тонна банан импорт қилинган. Қозоғистон, Туркия ва Қирғизистон каби давлатлардан эса нисбатан кам миқдорда — жами ҳисобда 300 тоннадан ортиқ банан келтирилган.
Қисқаси, банан бозорида Ўзбекистоннинг импорт географияси кенгайиб бормоқда, аммо асосий йўналиш ҳали ҳам Эквадор бўлиб қолмоқда. Кўриниб турибдики, сариқ мевага бўлган муҳаббат ҳали узоқ давом этади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
