Toshkent shahrida transport harakatidagi tirbandlikni kamaytirish va yo‘l tizimini zamonaviylashtirish bo‘yicha muhim yangilik e’lon qilindi. Prezident Shavkat Mirziyoyev 16-dekabr kuni o‘tkazgan yig‘ilishda poytaxtga tashrif buyuruvchi haydovchilar o‘z mashinalarini shahar tashqarisida quriladigan yirik turargohlarda qoldirib, markazga jamoat transportida kirishi mumkin bo‘lishi aytildi.
Dekabr oyi boshida imzolangan maxsus qarorga ko‘ra, Toshkentda transport boshqaruvi butunlay yangi bosqichga ko‘tariladi. Shaharda yagona intellektual markaz faoliyat yuritib, har bir ko‘cha va chorrahadagi harakat oqimini sun’iy intellekt orqali tahlil qiladi. Bu tizim tirbandliklarni oldindan bashorat qilib, YTHlarning oldini olishga xizmat qiladi.
Kelgusi yilda poytaxtga kirishdagi ikkita tekshiruv posti shahar tashqarisidagi hududlarga ko‘chiriladi, yana uchtasi qat’iy rekonstruksiyadan o‘tkaziladi. Bu nuqtalarda 3,5 mingta yuk avtomobili, 5,5 mingta yengil mashina uchun avtoturargohlar barpo etiladi. Shuningdek, haydovchi va yo‘lovchilar uchun kempinglar tashkil etilib, qulay sharoit yaratiladi.
Eng muhimi, ushbu nuqtalar jamoat transporti tarmog‘i bilan bog‘lanadi. Demak, poytaxtga kelgan mehmonlar o‘z avtomobillarini tashqarda qoldirib, tez, xavfsiz va arzon transport orqali shaharga bemalol kirishlari mumkin.
Shu bilan birga, shahar hokimligiga kelgusi yilda yo‘l harakati sifatini sezilarli darajada oshirish vazifasi yuklatilgan. Jumladan:
— 100 ta “aqlli” svetoforli chorrahalarni joriy etish;
— 30 mingta avtomobil to‘xtash joyini xususiy sektor bilan hamkorlikda barpo qilish;
— 300 ta bekatni qayta qurish;
— 40 km piyoda va 20 km veloyo‘laklar barpo etish;
— 100 km yo‘lni ta’mirlash;
— Yunusobod va Yashnobodda yo‘l o‘tkazgich hamda tunnel qurish;
— 200 ta elektrobus xarid qilish vazifasi belgilangan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
