Ispaniyaning Mundo Deportivo nashri tarqatgan xabarlarga koʻra, Barselona jamoasi Nyukasl hujumchisi Anthony Gordonni oʻz safiga qoʻshib olish poygasida yaqqol yetakchiga aylandi. Hozirgi holatga koʻra, kataloniyaliklar 25 yoshli Angliya terma jamoasi aʼzosi uchun kurashda Bavariya va Liverpul klublarini ortda qoldirishga muvaffaq boʻlishdi. Bu haqda Goal.com xabar beradi.
Gordon Ispaniyaga koʻchib oʻtishga qaror qilgan va uni Hansi Flick, sport direktori Deco hamda prezident Joan Laporta boshchiligidagi yangi loyiha oʻziga jalb etgan. Ushbu transfer poygasidagi burilish nuqtasi Deconing Londonga amalga oshirgan safari bilan bogʻliq. Garchi u yerda Chelsi hujumchisi Joao Pedro bilan ham aloqa oʻrnatilgan boʻlsa-da, asosiy maqsad aynan Gordon boʻlgani aytilmoqda.
Liverpulda tugʻilgan futbolchi hali yakuniy qarorini rasman eʼlon qilmagan boʻlsa-da, Barselona tomonidan koʻrsatilgan qatʼiy qiziqish uni Camp Nouda toʻp surishga undamoqda. Bavariya bir necha hafta oldin futbolchi bilan qiziqqan edi, Liverpul esa Muhammad Salah ketganidan soʻng tarkibni qayta qurish doirasida Gordonni oʻz safiga qaytarishga urinib koʻrdi.
Biroq, Mersisaydliklarning barcha harakatlari besamar ketganga oʻxshaydi, chunki futbolchi allaqachon kataloniyaliklar bilan shaxsiy shartnoma shartlarini kelishib olgan. Shunga qaramay, Barselona oldida moliyaviy toʻsiqlar mavjud. Anthony Gordonning Nyukasl bilan 2030-yilgacha shartnomasi borligi sababli, transfer narxi borasida yakuniy soʻzni ingliz klubi aytadi.
“Zamin”ni Telegramʻda oʻqing!
