GoPro kompaniyasi Starship V3 raketasining uchirilish jarayoni aks etgan hayratlanarli kadrlarni taqdim etdi. GoPro Mission 1 kamerasi yordamida bevosita start maydonchasi yaqinidan olingan ushbu videoda jarayonning barcha tafsilotlari aks etgan. Shuningdek, kompaniya 240 k/s chastotali, 4K formatdagi sekinlashtirilgan videoni ham eʻlon qildi. Bu haqda Ixbt.com xabar beradi.
Starship V3 raketasining balandligi qariyb 124 metrni tashkil etadi, uning umumiy tortish kuchi esa 18 million funtdan (taxminan 80 ming kN) oshadi. GoPro mutaxassislarining taʻkidlashicha, bu quvvat bir vaqtning oʻzida toʻliq quvvatda ishlayotgan 31 ta Boeing 747 yoʻlovchi samolyotining tortish kuchiga tengdir. Avvalroq SpaceX kompaniyasi 12-sinov parvozidan soʻng Starship S39 kemasining qoʻnish jarayonini ham namoyish etgan edi.
SpaceX rahbari Elon Musk kelajak raketalari uchun tortish kuchining massaga nisbati yuqori boʻlishi nima uchun muhimligini tushuntirib oʻtdi. Uning soʻzlariga koʻra, toʻliq koʻp marta ishlatiladigan tizimlarga oʻtish parvoz iqtisodiyotini tubdan oʻzgartiradi. Kompaniya yiliga 10 000 tadan ortiq raketa uchirishni, yaʻni har soatda kamida bitta Starship parvozini amalga oshirishni maqsad qilgan.
Maʻlum qilinishicha, soʻnggi parvoz davomida Starship barcha 22 ta Starlink sunʻiy yoʻldosh simulyatorlarini, jumladan, suratga olish uchun maxsus moslashtirilgan ikkita modifikatsiyani orbitaga muvaffaqiyatli chiqardi. 12-parvoz davomida SpaceX rekord oʻrnatib, orbitaga taxminan 45 tonna yuk olib chiqdi. Hozirda Federal aviatsiya boshqarmasi (FAA) parvozdan keyingi holatlar boʻyicha tekshiruv oʻtkazish masalasini koʻrib chiqmoqda.
“Zamin”ni Telegramʻda oʻqing!
