Rossiyaning "Byuro 1440" kompaniyasi tomonidan ishlab chiqilayotgan "Rassvet" sunʼiy yoʻldoshlar turkumi Starlink tizimining nusxasi emas, balki mamlakat raqamli iqtisodiyoti uchun yaratilgan mustaqil platformadir. "Iks xolding" va "Byuro 1440" bosh direktori Aleksey Shelobkovning taʼkidlashicha, loyiha xorijiy yechimlarni koʻchirmasdan, texnologik mustaqillikni taʼminlash maqsadida ishlab chiqilmoqda. Bu haqda Ixbt.com xabar beradi.
Loyiha asosida 5G NTN arxitekturasi yotadi, bu esa aloqa sifatini anʼanaviy sunʼiy yoʻldosh tizimlariga nisbatan yangi bosqichga olib chiqish imkonini beradi. Starlink asosan ommaviy internet xizmatlariga yoʻnaltirilgan boʻlsa, "Rassvet" birinchi navbatda transport, sanoat va aloqa operatorlari uchun sanoat platformasi sifatida loyihalashtirilgan.
Joriy yilning mart oyi oxirida "Byuro 1440" past orbitaga dastlabki 16 ta sunʼiy yoʻldoshni muvaffaqiyatli chiqardi. Ushbu apparatlar 5G NTN aloqasi, lazerli sunʼiy yoʻldoshlararo aloqa terminallari va plazmali dvigatel qurilmalari bilan jihozlangan boʻlib, bu Rossiyaning past orbitali guruhini shakllantirish yoʻlidagi ilk amaliy qadam hisoblanadi.
“Zamin”ni Telegramʻda oʻqing!
