Digital Foundry мутахассислари йил давомида графика жиҳатидан энг юқори даража кўрсатган ўйинлар рейтингини тақдим этди. DTF портали хабар беришича, анъанага мувофиқ, таҳлилчилар аниқ учта етакчини ажратиб кўрсатган, қолган номзодлар эса 4-ўриндан 10-ўрингача аниқ жойлашувсиз рўйхат шаклида эълон қилинган.
Йилнинг энг чиройли ўйини сифатида DOOM: The Dark Ages эътироф этилди. Digital Foundry экспертлари ушбу отишма ўйинида глобал ёритиш учун нур излаш технологияси жуда юқори самарадорликда жорий этилганини алоҳида таъкидлашди. Энг қизиғи, бу технология ҳатто нисбатан камқувват ҳисобланган Xbox Series S платформасида ҳам барқарор ишлайди.
Ўйин турли тизим ва конфигурацияларга муваффақиятли мослашади. Кучли компьютерлар ва замонавий консолларда эса илғор нур излаш имкониятлари тўлиқ очиб берилган. Мутахассислар муҳит бузилиши, объектлар ва душманларнинг ҳаракатга реал жавоб қайтариши FPS кескин пасаймасдан амалга оширилганини юқори баҳолашди.
Иккинчи ўринда Assassin’s Creed Shadows жой олди. Таҳлилчилар уни Assassin’s Creed Unity давридан бери сериядаги энг визуал таъсирчан ўйин деб аташди. Глобал ёритишда нур излаш, муҳит бузилиши, шамол симуляцияси ва ўсимликлар билан ўзаро таъсир каби элементлар ўйин графикасини янги босқичга олиб чиққан.
Digital Foundry фикрича, энг юқори тажрибани кучли шахсий компьютерлар, PS5, айниқса PS5 Pro версияси ҳамда Xbox Series X тақдим этади.
Учинчи поғонани Death Stranding 2: On The Beach эгаллади. Экспертлар ўйинда деталларга бўлган юксак эътиборни — майда объектлардан тортиб, улкан локацияларгача — алоҳида қайд этишди. Ёритиш тизими эса ҳатто нур излашсиз ҳам кинематографик атмосфера яратишга қодир.
Мураккаб заррачалар рендеринги ва умумий визуал услуб PS5 имкониятларининг энг юқори чегарасига яқин даражада баҳоланди.
Рейтингнинг 4–10-ўринлари аниқ кетма-кетликсиз берилди. Бу рўйхатдан Silent Hill f, Routine, Metroid Prime 4, Mafia: The Old Country, Ghost of Yōtei, Earthion ва Dying Light: The Beast ўйинлари ўрин олди.
Шу тариқа, 2025 йил ўйин индустриясида график сифат бўйича жуда юқори марра қўйгани, технологиялар эса энди фақат геймплей эмас, визуал тажрибада ҳам янги даврни бошлаб бергани яққол намоён бўлди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
