АҚШнинг янги солиқ сиёсати глобал валюта бозорларига таъсир кўрсатмоқда

АҚШ доллари евро, япон енаси ва бошқа асосий валюталарга нисбатан жорий ҳафта барқарорликни сақлаб қолмоқда. Бунга Президент Доналд Трамп бошчилигидаги маъмурият томонидан илгари сурилган янги солиқ сиёсати, кучли меҳнат бозори кўрсаткичлари ҳамда савдо сиёсатига оид янгиликлар сабаб бўлмоқда. Бу ҳақда Реутерс агентлиги хабар берди.

Кутилганидан кучлироқ иқтисодий маълумотлар долларни қўллаб-қувватлади.

АҚШ Меҳнат Департаментининг июн ойи учун якуний ҳисоботига кўра, мамлакатда 147 мингта янги иш ўрни яратилган. Бу кўрсаткич АҚШ ОАВ томонидан ўтказилган сўровда кутилган 110 минглик прогноздан анча юқори. Натижада, бозор иштирокчиларининг АҚШ Федерал Резерв тизими (ФEД) томонидан фоиз ставкаларини июл ойидаги йиғилишда ўзгартирмаслиги ҳақидаги ишончи 76,2% дан 95,3% га ошди. Мутахассисларнинг фикрича, ставкаларни пасайтириш эҳтимоли энг камида сентябрь ойига қолдирилади.

Трамп маъмурияти томонидан илгари сурилган “Катта, Гўзал Қонун” (Big, Beautiful Law) номли солиқ ислоҳоти пакети Вакиллар палатаси томонидан маъқулланди. 3,4 триллион АҚШ долларини ташкил қилувчи бу қонун янги харажатлар ва солиқ имтиёзларини назарда тутади. Бироқ, у билан бирга АҚШнинг умумий давлат қарзини 36,2 триллион долларга етказиши кутилмоқда. Бу эса узоқ муддатда молиявий барқарорлик ва облигациялар бозори учун хавф туғдириши мумкин.

Шу билан бирга, 4-июл – АҚШда Мустақиллик куни байрами муносабати билан молиявий бозорлар ёпилган бўлса-да, инвесторларнинг эътибори 9-июл санасига қаратилган. Трамп айнан шу куни АҚШ билан савдо битими имзоламаган давлатлар, жумладан Япония, учун янги тарифлар жорий этишни режалаштирмоқда. Бу эса халқаро савдо муносабатларига ноаниқлик киритмоқда.

Жума куни евро АҚШ долларига нисбатан 0,1% га ошиб, $1.1769 даражасини ташкил этди. Фунт стерлинг $1.3668 га кўтарилган бўлса, япон енаси эса долларга нисбатан 144.69 даражасида савдо қилинди. Австралия доллари $0.6577, Янги Зеландия доллари эса 0,2% га ошиб, $0.608 даражасига етди. Бу ўсишлар инвесторлар томонидан рискли активларга бўлган қизиқиш кучайганини кўрсатмоқда.

Ушбу глобал молиявий жараёнлар Ўзбекистон иқтисодиёти учун ҳам бевосита аҳамиятга эга. АҚШ долларининг барқарорлиги ёки кучайиши, айниқса, импорт қилинадиган хомашё ва технологиялар нархига, шунингдек, халқаро савдо ҳисоб-китобларига таъсир кўрсатиши мумкин. Шунингдек, йирик марказий банкларнинг фоиз ставкаларидаги ўзгаришлар Ўзбекистоннинг халқаро молиявий муассасалар билан бўладиган ҳамкорлигига, кредит шартларига ҳам таъсир қилиши эҳтимолдан ҳоли эмас.

Ҳозирда глобал валюта бозорлари нотинч, аммо инвесторлар кучли иқтисодий асосий кўрсаткичлар ва ижобий савдо истиқболларига таянган ҳолда АҚШ долларига ишонч билдирмоқда. «Замин»ни Telegram’да ўқинг!