AQShning yangi soliq siyosati global valyuta bozorlariga ta’sir ko‘rsatmoqda

AQSh dollari yevro, yapon yenasi va boshqa asosiy valyutalarga nisbatan joriy hafta barqarorlikni saqlab qolmoqda. Bunga Prezident Donald Tramp boshchiligidagi ma’muriyat tomonidan ilgari surilgan yangi soliq siyosati, kuchli mehnat bozori ko‘rsatkichlari hamda savdo siyosatiga oid yangiliklar sabab bo‘lmoqda. Bu haqda Reuters agentligi xabar berdi.

Kutilganidan kuchliroq iqtisodiy ma’lumotlar dollarni qo‘llab-quvvatladi.

AQSh Mehnat Departamentining iyun oyi uchun yakuniy hisobotiga ko‘ra, mamlakatda 147 mingta yangi ish o‘rni yaratilgan. Bu ko‘rsatkich AQSh OAV tomonidan o‘tkazilgan so‘rovda kutilgan 110 minglik prognozdan ancha yuqori. Natijada, bozor ishtirokchilarining AQSh Federal Rezerv tizimi (FED) tomonidan foiz stavkalarini iyul oyidagi yig‘ilishda o‘zgartirmasligi haqidagi ishonchi 76,2% dan 95,3% ga oshdi. Mutaxassislarning fikricha, stavkalarni pasaytirish ehtimoli eng kamida sentyabr oyiga qoldiriladi.

Tramp ma’muriyati tomonidan ilgari surilgan “Katta, Go‘zal Qonun” (Big, Beautiful Law) nomli soliq islohoti paketi Vakillar palatasi tomonidan ma’qullandi. 3,4 trillion AQSh dollarini tashkil qiluvchi bu qonun yangi xarajatlar va soliq imtiyozlarini nazarda tutadi. Biroq, u bilan birga AQShning umumiy davlat qarzini 36,2 trillion dollarga yetkazishi kutilmoqda. Bu esa uzoq muddatda moliyaviy barqarorlik va obligatsiyalar bozori uchun xavf tug‘dirishi mumkin.

Shu bilan birga, 4-iyul – AQShda Mustaqillik kuni bayrami munosabati bilan moliyaviy bozorlar yopilgan bo‘lsa-da, investorlarning e’tibori 9-iyul sanasiga qaratilgan. Tramp aynan shu kuni AQSh bilan savdo bitimi imzolamagan davlatlar, jumladan Yaponiya, uchun yangi tariflar joriy etishni rejalashtirmoqda. Bu esa xalqaro savdo munosabatlariga noaniqlik kiritmoqda.

Juma kuni yevro AQSh dollariga nisbatan 0,1% ga oshib, $1.1769 darajasini tashkil etdi. Funt sterling $1.3668 ga ko‘tarilgan bo‘lsa, yapon yenasi esa dollarga nisbatan 144.69 darajasida savdo qilindi. Avstraliya dollari $0.6577, Yangi Zelandiya dollari esa 0,2% ga oshib, $0.608 darajasiga yetdi. Bu o‘sishlar investorlar tomonidan riskli aktivlarga bo‘lgan qiziqish kuchayganini ko‘rsatmoqda.

Ushbu global moliyaviy jarayonlar O‘zbekiston iqtisodiyoti uchun ham bevosita ahamiyatga ega. AQSh dollarining barqarorligi yoki kuchayishi, ayniqsa, import qilinadigan xomashyo va texnologiyalar narxiga, shuningdek, xalqaro savdo hisob-kitoblariga ta’sir ko‘rsatishi mumkin. Shuningdek, yirik markaziy banklarning foiz stavkalaridagi o‘zgarishlar O‘zbekistonning xalqaro moliyaviy muassasalar bilan bo‘ladigan hamkorligiga, kredit shartlariga ham ta’sir qilishi ehtimoldan holi emas.

Hozirda global valyuta bozorlari notinch, ammo investorlar kuchli iqtisodiy asosiy ko‘rsatkichlar va ijobiy savdo istiqbollariga tayangan holda AQSh dollariga ishonch bildirmoqda. “Zamin”ni Telegramʻda oʻqing!