3 қараша күні Рим орталығында, Император форумы маңында орналасқан Торре дей Конти мұнарасының бір бөлігі құлап түсті. Бұл ғимаратта 2022 жылдан бері қалпына келтіру жұмыстары жүргізіліп жатқан еді және оларды 2026 жылы аяқтау жоспарланған болатын.
Kursiv Uzbekistan журналисі оқиға орнына барып, құтқарушылар жүргізіп жатқан жұмыстарды бақылады. Олар қираған жерлерді тазалап, мұнараның зақымданған бөлігін тексерді.
Құтқарушылар 64 жастағы жұмысшыны үйінді астынан алып шықты. Ол ауыр бас миы жарақатымен ауруханаға ауыр жағдайда жеткізілді.
Тағы екі жұмысшы жеңіл жарақат алды және олар ауруханаға жатудан бас тартты. Ғимараттың айналасы толық қоршалып, құтқарушылар кешке дейін жұмыстарын жалғастырды.
Олар қалған құрылымдардың беріктігін де тексерді. Оқиға орнына мемлекеттік мекемелердің өкілдері де келді.
Мәлімет үшін: мұнара 1203 жылы Рим папасы Иннокентий III-нің туысы Риккардо Контидің бұйрығымен тұрғызылған. Алғашында оның биіктігі 50 метрге жеткен және орта ғасырдағы Римнің ең биік қорғаныс мұнараларының бірі болған.
Кейінгі ғасырлардағы зілзалалар мен қираулар салдарынан мұнараның жоғарғы қабаттары жоғалып, қазіргі биіктігі шамамен 29 метрді құрайды. Түрлі кезеңдерде мұнара қамал және ақсүйек әулеттері үшін баспана ретінде пайдаланылған.
20-ғасырда ауқымды қалпына келтіру жұмыстары жүргізілсе де, ғимарат жасының үлкен болуына байланысты осал болып қалды.
