Стамбул Бас прокуратурасы 37 адамға, соның ішінде Израиль премьер-министрі Биньямин Нетаньяхуға қамауға алу ордерін шығарды. Бұл туралы Anadolu ақпарат агенттігі хабарлады.
Олар адамзатқа қарсы қылмыстар мен геноцид жасады деп айыпталуда. Тізімге, сондай-ақ, Израильдің қорғаныс министрі Йисраэль Кац және ұлттық қауіпсіздік министрі Итамар Бен-Гвир де енгізілген.
Ведомствоның мәліметінше, Израиль үкіметінің Газада жүргізген әрекеттері салдарынан әйелдер мен балалар қаза тапқан, көптеген адамдар жарақат алған. Сонымен қатар, кейбір аймақтар өмір сүруге жарамсыз күйге түскен.
«Израиль шенеуніктері адамзатқа қарсы қылмыстар мен Газа секторында жүйелі түрде жасалған геноцид әрекеттері үшін, сондай-ақ Самуд жаһандық флотилиясына қарсы қабылданған шаралар үшін жауапты», — делінген прокуратура мәлімдемесінде. Израиль сыртқы істер министрі Гидеон Саар Стамбул бастамасына қатысты пікір білдіріп, бұл қадамды Түркия президенті Режеп Тайып Ердоғанның пиар акциясы деп атады.
Ол Түркия сот жүйесін саяси оппозицияны басып-жаншу мен журналистерді қамау істерімен айналысады деп айыптады. Сонымен қатар, Палестинаның ХАМАС қозғалысы Стамбулға алғысын білдіріп, Түркия халқы мен оның басшылығының жоғары ұстанымын мойындады, деп хабарлайды CNN.
