Xiaomi маиший техника учун 10 йиллик МиКаре кафолат дастурини ишга туширди
Xiaomi компанияси йирик маиший техника воситалари учун мўлжалланган расмий МиКаре кафолат дастури ишга туширилганини эълон қилди. Ушбу дастур кондиционерлар, музлаткичлар, кир ювиш машиналари ва телевизорлар учун хизмат кўрсатиш муддатини сезиларли даражада узайтиришга қаратилган. Бу ҳақда Ixbt.com хабар беради.
Янги хизмат доирасида фойдаланувчилар ўз қурилмалари учун 10 йилгача бўлган муддатга расмий кафолатни расмийлаштиришлари мумкин. Бу фойдаланувчиларга узоқ муддатли фойдаланиш давомида кутилмаган носозликлар ва таъмирлаш харажатларидан ҳимояланиш имконини беради.
Компания дастурнинг ишга туширилиши муносабати билан махсус акция эълон қилди. 20-майдан 21-июнга қадар МиКаре хизматига уланиш учун 50 фоизгача чегирмалар тақдим этилади. Хизмат нархи атиги 54 юандан бошланиши белгиланган.
МиКаре дастури нафақат бепул таъмирлашни, балки эҳтиёт қисмларни алмаштириш ва мутахассисларнинг техник кўригини ҳам ўз ичига олади. Бу Xiaomi брендининг ўз маҳсулотлари сифатига бўлган ишончини ва мижозларга ғамхўрлигини яна бир бор тасдиқлайди.
