Паркентдаги воқеа ортидан она интервю берди (видео)
Паркент туманида онасига нисбатан ҳақорат ва таҳдид қилган 37 ёшли аёлга нисбатан 5 суткалик маъмурий қамоқ жазоси қўллангани ҳақида аввал хабар берилган эди.
Мазкур ҳолат жамоатчиликда кенг муҳокамаларга сабаб бўлгач, воқеада жабрланган она яқинда интервю берди. У ўз ҳаёти ва бошидан кечирганларини батафсил сўзлаб берди.
Онанинг айтишича, у Паркент тумани, Қорақалпоқ қишлоғида яшайди ва ўзини Абдураимова Мастура Турсунхўжаевна деб таништирди. У 1988 йилда қиз фарзанд асраб олганини, Ёқубова Зумрад исмли фарзандни эса ўз бағрига олиб, уни ҳеч қачон ўгай деб ажратмаганини таъкидлади.
“Уни ўз фарзандимдек катта қилдим. Ҳатто ўз болаларимдан ҳам ортиқ меҳр бердим. Ҳеч қачон ўгайлик қилмадим, қўлимдан келган барча яхшиликни қилдим,” — дейди она.
Шунингдек, у оилада юзага келган молиявий ва маиший муаммолар ҳақида ҳам сўзлаб, баъзи мулклар ва маблағлар йўқотилганини, оилавий муҳит эса оғирлашиб кетганини билдирди.
“Яхши турмуш ўртоғим ҳам азоб чекди. Янги олинган машина ҳам зарар кўрди, харажатлар кўпайди. Икки дона соғиладиган сигиримни ҳам сотган эдим, пуллари ҳам йўқолган. Қизларимга ҳам тинчлик бермаяпти,” — деди у.
Ҳозирда мазкур ҳолат атрофлича ўрганилмоқда.
