Автомобилида “аптечкаси” бўлмаган 200 нафарга яқин ҳайдовчи аниқланди

Тошкент вилоятида йўл ҳаракати хавфсизлигини таъминлаш, йўл-транспорт ҳодисаларининг олдини олиш мақсадида, бир қатор ташкилий ва амалий чора-тадбирлар амалга оширилмоқда.

Ҳафта давомида Тошкент вилоят ҳудудида 24 та йўл-транспорт ҳодисаси содир этилиб, 24 нафар шахс турли даражада тан жароҳатлари олган. Бу ҳақда Тошкент вилоят ИИБда бўлиб ўтган брифингда маълум қилинди.

Йўл ҳаракати хавфсизлиги бошқармаси ходимлари томонидан 3 минг 931 та йўл ҳаракати қоидабузарликлари аниқланди. Булардан, қўпол қоидабузарликлар 1 минг 459 тани, жумладан, транспорт воситасини маст ҳолда бошқариш 85 тани, белгиланган тезликни ошириш қоидабузарлиги 271 тани, темир йўл кесишмасидан ўтиш қоидасини бузиш 5 тани, одам ташиш қоидасини бузиш 609 тани, телефондан фойдаланиш қоидасини бузиш 10 тани ва бошқа қоидабузарликлар 457 тани ташкил этади.

Шунингдек, 1 минг 242 та хавфсизлик камаридан фойдаланмаслик, 189 та транспорт воситасини ўт ўчириш воситаси, жилет ва дори-дармон қутисисиз бошқариш, 118 та транспорт воситасини тегишли ҳужжатларсиз бошқариш ва 103 та пиёдалар томонидан содир этилган қоидабузарликлар аниқланган.