Чилонзорда сауна ёниб кетди. Бир киши қутқариб қолинган

^{Фото: Давлат ёнғин хавфсизлиги хизмати}
Тошкентнинг Чилонзор тумани Арнасой кўчасида жойлашган «Здоровое Тело» компаниясига қарашли саунада 15 сентябрь, якшанба куни соат 16:45 атрофида ёнғин юз берган.
Давлат ёнғин хавфсизлиги хизматидан хабар беришларича, иккита ўт ўчириш бўлинмаси ҳодиса жойига соат 16:52 да етиб борган ва ёнғин 17:04 да ўчирилган.

Ёнғин оқибатида саунанинг 6 квадрат метр майдонида ички жиҳозлари ёнган, 114 квадрат метр майдони эса ёнғиндан сақлаб қолинган.
«Саунанинг 27 ёшли ишчиси тутундан димиққан ҳолда қутқариб қолинган ва шифохонага юборилган», — дейилади ДЁХХ ахборотида.

Дастлабки тахминларга кўра, ёнғин саунадаги қозонхонанинг қизиб кетиши оқибатида юз берган.