Реал Гюлернинг 75-ўйин бонуси учун 2 млн тўлайди

Испания чемпионатининг 11-тури доирасида Мадриднинг \"Реал\" клуби \"Валенсия\" устидан 4:0 ҳисобида йирик ғалабага эришди. Ушбу ўйинда \"Реал\"нинг туркиялик ярим ҳимоячиси Арда Гюлер ҳам майдонга тушди.

Бу беллашув Гюлер учун \"Қироллик клуби\" таркибидаги 75-ўйин бўлди. Diario ASнинг маълумотига кўра, \"Реал\" раҳбарияти ушбу ўйиндан сўнг \"Фенербахче\" клубига 2 миллион евро бонус тўлаши керак.

Эслатиб ўтамиз, Гюлер 2023-йилнинг ёзида Мадрид клубига трансфер қилинган эди. У \"Реал\" сафида ўтказган 75 ўйинда 15 та гол уриб, 17 та голли узатмани амалга оширган.

Футболчининг шартномаси 2029-йил ўртасигача мўлжалланган бўлиб, унинг трансфер қиймати ҳозирда 60 миллион еврога баҳоланмоқда.